نفس اور روح

—   —   —

ہم عام طور سے دو الفاظ بولتے ہیں روح اور نفس. کیا یہ دونوں ایک ہی ہیں؟ اگر یہ دونوں ایک ہی ہیں تو ان کی حقیقت کیا ہے، اگر یہ الگ ہیں تو ان دونوں میں فرق کیا ھے؟

قرآن مجید میں نفس اور روح دونوں الفاظ کا استعمال ہواہے، روح کا استعمال کم اور نفس کا زکرزیادہ۔ ایک جگہ فرمایا “قل الروح من امر ربی” (١٧: ٨٥) حضرت جبرائیل (علیہ السلام) اور فرشتوں کو بھی روح کہا گیا ہے۔ اس لئے کہا جا سکتا ہے کہ روح اللہ کا امر ہے. ایک بات یہ بھی ہے کہ کسی بھی چیز کا عدم وجود میں آنا اللہ کے امر سے ہی ہے. اس لحاظ سے ہم سب اللہ کا امر ہیں۔ اس اعتبار سے اگر غور کیا جاۓ تو معلوم ہوگا کہ اللہ کا امرغلط یا برا نہیں ھوسکتا۔ جب امر رب غلط یا برا نہیں ہو سکتا تو روح بھی غلط یا بری نہیں ہو سکتی. لہٰذا روح کو غلط یا بری کہنا درست نہیں ہے.

قران مجید میں جزا اور سزا کا جہاں ذکر ہے وہاں اس کا تعلق نفس سے ھےنہ کہ روح سے۔ امر ربی نہ کوئی سزا ہے اور نہ امر رب کو سزا کا سزاوار ٹھہرایا جا سکتا ہے. ہر انسان کی روح پاک اور مقدس ہے. اسی لیے قران میں الله نے فرمایا “وَ لَقَدۡ کَرَّمۡنَا بَنِیۡۤ اٰدَمَ” (ہم نے بنی آدم کو بزرگی دی” (١٧:٧٠) اس لحاظ سے کسی بھی انسان کی تکریم کے لیے بس اتنی بات کافی ہے کہ وہ الله کی روح یعنی انسان ہے۔

جہاں تک نفس کا تعلّق ہے تو وہ الگ سے کوئی چیز نہیں بلکہ روح سے وجود میں آنے والی شخصیت کا نام ہے. ماں کے پیٹ میں مرد کے نطفے سے وجود میں آنےوالے خون کے لوتھڑے کے اندر جب الله کی طرف سے روح پھونک دی جاتی ہے. شعور کے پروان چڑھنے تک وہ ایک معصوم ہستی ہے، وہ الله کی طرف سے بھیجا گیا کلمہ ہے، البتہ جیسے جیسے شعور پختہ ہوتا جاتا ہے اس پر اس دنیا کی چیزیں حملہ کرتی ہیں ان حملہ آوروں میں شیاطین کے وسوسات، ماحول، تعلیم وتربیت، خواہشات، ماں باپ کے اعتقادات وغیرہ بھی شامل ہیں۔ روح ان حملوں کا مقابلہ کرتی ہے. اسکے نتیجے میں میں ایک شخصیت ابھرتی ہے، اسی شخصیت کا نام نفس ھے۔ روح کی مثال بیج سے دی جاسکتی ہے اورنفس کی مثال اس بیج سے اگنے والے درخت کی ہے. جس طرح بیج سے الگ درخت کوئی چیز نہیں ہے اسی طرح نفس بھی روح سے الگ کوئی وجود نہیں ہے، جس درخت کے اندر بیج موجود ہوتا ہے اسی طرح انسان کی شخصیت میں روح موجود ہوتی ہے. جس طرح ہم کہ سکتے ہیں کہ بیج ہی اصل درخت ہے جو نظر نہیں آتا لیکن موجود ہوتا ہے اسی طرح نفس میں روح موجود ہے.

اب بیج کو جیسا ماحول ملےگا ویسا ہی درخت کی ساخت وجود میں آئیگی. اگر مناسب زمین نہ ہو، کھاد اور پانی پوری طرح نہ ملے، حملہ آور دشمنوں (یعنی آس پاس کے خود روپودوں) سے حفاظت نہ کی جائے تو اس بیج سے نکلنے والا درخت کمزور ہی رہے گا۔ بالکل اسی طرح انسان اس دنیا میں روح کے ساتھ پیدا ہوتا ہے، پھر جب وہ نشوونما پانے لگتا ہے تو ضرورت ہوتی ہے اسے شیطان کے حملوں سے بچانے کی، آس پاس کے ماحول کو درست رکھنے کی، اگر ایسا نہ کیا گیا تو اس روح سے جو نفس یعنی جو شخصیت وجود میں آئیگی وہ کمزور اور نحیف ہوگی اور ماحول کا اثر جوں جوں گندہ ہوتا جائیگا ویسے ویسے ہی نفس میں کثافتیں چڑھتی چلی جاینگی.

موٹے طور پر تین طرح کے نفس ہوتے ہیں

:

1۔ نفس امارہ

2۔ نفس لوامہ

3۔ نفس مطمئنہ

جب شیطان کے وسوسات، آس پاس کے ماحول کی گندگی روح پر اپنے اثرات ڈالنے شروع کرتے ہیں اور روح سے وجود میں آنے والی شخصیت یعنی نفس پراگندہ ہونا شروع ہوتا ہے تو شروع میں جو بچاؤ ہوتا ہے اس کیفیت کو لوامہ سے تعبیر کیا گیا ہے. انسانی جسم کے اندر الله نے شعور، یعنی نیکی اور بدی کی تمیزکرنے کی جو صلاحیت رکھی تھی، جس کو ضمیر کا نام بھی دیا جاتا ہے وہ اس کوملامت کرتا اور کچوکے لگاتا ہے،

اللہ تعالیٰ نے قرآن مجید میں اس نفس کی قسم کھائی ہے :

وَلَا اُقْسِمُ بِالنَّفْسِ اللَّوَّامَةِO

’’اور میں نفس لوامہ کی قسم کھاتا ہوں۔‘‘ القيامة، 75 : 2

اگر روح کو اس الارم کے بجنےپر برائی سے روکا نہ گیا تو نفس جو وجود میں آ رہا ہوتا ہے وہ نفس امّارہ بن جانے کی طرف مائل ہو جاتا ہے یعنی اس کے لیے ایک بری شخصیت بن جانے کا راستہ ہموار ہو جاتا ہے. قرآن مجید میں اس کا ذکر کچھ اس طرح کیا گیا ہے کہ:

{وَمَا أُبَرِّئُ نَفْسِي إِنَّ النَّفْسَ لَأَمَّارَةٌ بِالسُّوئِ إِلَّا مَا رَحِمَ رَبِّي إِنَّ رَبِّي غَفُورٌ رَحِيمٌ}

’’میں یہ دعوی نہیں کرتا کہ میرا نفس بالکل پاک صاف ہے ۔ واقعہ یہ ہے کہ نفس تو برائی کی تلقین کرتا ہی رہتا ہے ، ہاں میرا رب رحم فرمادے تو بات اور ہے ( کہ اس صورت میں نفس کا کوئی داؤ نہیں چلتا ) بیشک میرا رب بہت بخشنے والا ، بڑا مہربان ہے ‘‘

[یوسف :۵۳]

اگرضمیر کی اس ملامت یعنی الارم کے بجنے پر روح کو کثافتوں میں پھنسنے سے بچا لیا جاتا ہے تو نفس اپنی اصل حالت یعنی روح کی طرف مائل ہونے لگتی ہی جسے اطمینان کی کیفیت کہتے ہیں اور اس کیفیت سے جو نفس یعنی شخصیت وجود میں آتی ہے اس سے الله راضی ہوتا ہے اور الله اسے پھر اپنے مقرّب بندوں میں شامل کر لیتا ہے. اس نفس مطمئنہ کے متعلق اللہ تعالیٰ نے فرمایا :

{يَا أَيَّتُهَا النَّفْسُ الْمُطْمَئِنَّةُارْجِعِي إِلَي رَبِّكِ رَاضِيَةً مَرْضِيَّةً}

’’اے اطمینان والی روح تو اپنے رب کی طرف لوٹ چل اس طرح کہ تو اس سے راضی اور وہ تجھ سے خوش‘‘

[الفجر:۲۷۔۲۸]

اوپر کی بحث سے جو نتیجہ نکلتا ہے وہ یہ ہے کہ نفس لوامہ ایک الارم کی کیفیت کا نام ہے، انسان اس مقام پر ٹھہرتا نہیں ہے وہ یا تو اس ملامت یعنی ضمیر کی آواز کو دبا دیتا ہے نتیجتاً شخصیت تباہ و برباد ہو جاتی ہے. روح سے وجود میں آنے والا نفس اپنی اصل حالت (روح کی حالت) سے دور بہت دور چلا جاتا ہے یا پھر اس ضمیر کی آواز پر انسان لبّیک کہتا ہے اور اپنے آپ کو کثافتوں اور گندگیوں سے دور کر لیتا ہے اور اس طرح وہ اپنی اصل حالت یعنی روح کی حالت پر واپس پہنچنے میں کامیاب ہو جاتا ہے جسے ہم نفس مطمئنہ کے نام سے جانتے ہیں .

علامہ اقبال نے اس نفس کو خودی کا نام دیا ہے. اس اعتبار سے انسان دو میں سے کسی ایک کیفیت میں پایا جاتا ہے یا تو انسان کا نفس (نفس امارہ) یعنی خودی اس پر غالب آ جاتی ہے یا پھر وہ خود خودی پر غالب آ جاتا ہے، یعنی نفس مطمئنہ کی کیفیت کو پہونچ جاتا ہے.

اگر انسان اپنی خواہشات پر قابو رکھتا اور شیطان کے وسوسات سے محفوظ رہتا ہے تو سمجھنا چاہیے کہ وہ خودی پر غالب ہے، اس کا نفس اس کے کنٹرول میں ہے اور نفس مطمئنہ ہوکر خدا کے مقربین میں شامل ہوگا اور ہمیشہ کی کامیابی اس کو مقدر ہوگی. لیکن اگر وہ اپنی خواہشات کا اسیر ہے تو یقین کر لینا چاہیے کہ خودی اس پر غالب آ گئی ہے اور اس کی روح نفس امّارہ بن کر ایک تباہ کن شخصیت بن گئی ہے، جس سے دنیا کی بھی تباہی ہے اور آخرت میں بھی اذیت ناک اندھیروں میں بھٹکتا رہیگا جس کا نام جہنّم ہے.

مختصر طور پر کہا جا سکتا ہے کہ چونکہ انسان امر اور خلق کی ایک مجموعی ہستی ہے اس لیے اس کے اندر دو طرح کی خواہشات پائی جاتی ہیں۔ ایک اللہ کو پہچاننے اور اس کے احکام بجا لاکر اللہ سے تعلق اور قربت حاصل کرنے کی خواہش اور دوسری اللہ کے احکام کو نظرانداز کر کے جسمانی یا دنیاوی اشیاء کو حاصل کرنے کی خواہش۔

اوّل صورت میں روح کو تقویت پہنچتی ہے، اعمال اور کردار کی بلندی فراہم ہوتی ہے اور انسان کو عروج نصیب ہوتا ہے سو اُسکی روح مطمئن ہوتی جاتی ہے اور اُسکا نفس بھی مطمئن ہو جاتا ہے۔

اس کے برعکس دوسری صورت میں انسان (اگر اپنے آپ کو کنٹرول نہ کرےتو) لگاتار دنیا کی پستیوں میں لڑھکتا چلا جاتا ہے اُسکا کردار بد سے بدتر اور گھنونا ہوتا چلا جاتا ہے۔ سو اُسکی روح لاغر ہوتی جاتی ہے اور نفس اس پر حاوی ہوتا جاتا ہے یہاں تک کہ وہ نفس امّارہ بن جاتا ہے